Jeu de société «KHAYER W AKTAR»

لعبة خير و أختار, لعبة تحفونة برشا باش تخليك تتعرف على روحك و على صحابك أما نقولك من توا كانك مش متكلماني منغير ما تلعب و تحشم روحك, توا خلينا نفسرولكم اللعبة كيفاش تتلعب اول حاجة تحطو اوراق الاسئلة و المواقف على جنب و كل واحد ياخو ورقة تصويت، و الي شرا اللعبة هوا الي يجبد أول ورقة سؤال و يحطها في الوسط . و بعد كل واحد يجاوب بورقة التصويت باستعمال الجهة 1 او 2 . اهم حاجة في اللعبة هي السرعة ,خفة اليد و المصداقيه، لازم الناس الكل تقلبو وراق التصويت فرد وقت و الاقلية ( الي هوما جاوبو براي مخالف للاغلبية ) هوما الخاسرين. لهنا الخاسرين لازم تكون عندهم السرعة و خفة اليد, خاطر الي يحط يدو لخر على ورقة السؤال عندو 5 دقائق باش يقنع الاغلبية باش يبدلو رايهم . و بعد مايكمل يحكي باش يصير تصويت بنفس الطريقة الأولى الناس الكل تقلب أوراقها فرد وقت لكن المرة هذي باستعمال أوراق اقنعني و لا ما اقنعنيش و أكيد الاغلبية أكهو عندهم الحق باش يصوتو في حالة اقنعهم يمنع من الخسارة و ورقة السؤال تتحط على جنب و في حالة مااقنعهمش يخسر و ياخو ورقة السؤال . الي يلم اكثر أوراق أسئلة هو الخاسر. اما ردو بالكم راو فما أوراق تنجم تقلب الطرح الي هما +1 و +2 الي كان واحد يجبد ورقة الزيادة عندو الحق يعطي عدد أسئلة ملي عندو للي على اليمين و لا على اليسار على حسب الي مكتوب في الورقة